BEEGDEN.COM - ONZE MASCOTTE BEGELTJE
WOEARÓM EINE EGEL ES MASCOTTE?
Egels (Latijn: Erinaceus europaeus) laeve al 50 miljoen jaor op aerd en väörgengers van dit soeart zelfs al tösse de 15 en 20 miljoen jaor.
De egel huertj toet de femilie van de Erinaceidae, insekte aeters (insectivora).
Alle egels zeen zaol-gengers met eine tamelijk lange kop, spits en kegelvormig.
Zaolgengers rake ónger t loupe met de ganse vootzaol de gróndj. De miens is eine halfzaolgenger.
Bie de Europese egels waere 2 soearte óngersjeje: de Erinaceus europaeus en de Erinaceus roumanicus.
De ieëste soeart kumptj in Nederland väör en dus ouch in Bieëgdje. Egels die gans wit zeen numtj men albino-egels (Huere ouch gewuen toet de Erinaceus europaeus).
De egel hieët ein dieke sjpierkap met eine staekeldragendj vel op ziene rögk, det bie t oprolle zien ganse lief inpaktj. Dit oprolle duit de egel door de sjpierkap wie eine zak uever zien lichaam same te trekke, de penne gaon den gans rechtop sjtaon. Zoea waerdj hae eine sjtieve, sjtaekelige bal. Mer bie aansjtormendje autos baatj dit oprolle neet, jaomergenóg.
Gemiddeldj hieët eine egel óngevieër 6000 sjtaekels van 1 a 2 cm lank.
Met zien bolle zjwarte kralouche zuut de egel hieël sjlecht. Mer des te baeter kintj hae ruke.
Boete de normale zintuge hieët eine egel nog ein zesde zintuug, nl. t orgaan van Jacobson. Dit extra zintuug ligktj tösse t gehemelte en e naasholte vlak väör de inwendige naasuepening.
Met dit orgaan waere noew luchskes óngerzócht.
VÄÖRTPLANTJING
Nao 9 toet 11 maondje is oze egel in sjtaot óm zich väört te plantje.
Menkes loupe sjnachs waal 2 toet 3 kilomaeter, op zeukl nao ein vruike.
De jónge waere tösse mei en september geboeare nao eine draagtied van 35 daag. Meistal 5 toet 7 jónge.
Nao óngevieër drie waeke gaon de uigskes en oeare oeape. De egelkes zeen noe behaordj en höbbe al ą 2000 sjtaekels.
Nao 2 toet 3 maondj, es de jónge väör zichzelf kinne zorge, waere ze door de moder verjaagdj.
Wie laeftj de egel?
De natuurlikke laefómgaeving van eine egel is ein boesriek gebied. Ze kinne zich dao good versjtoppe en nestmatriaal vinje. Egels bekleje häör nest met blajer, plantje, mós en graas.
t nest kintj ein zelfgemaaktj hol zeen, mer ouch eine holle boum of ein aod knienehol. Ueverdaag duit hae sjlaope (18 oer) en sjnachs geit dr op jacht.
De egel is wakker in de lente, zomer en herfst. In de herfst sjleit hae eine vetväörraod op, daodoor kintj hae ziene wintjersjlaop ueverlaeve. Egels in de natuur bereike nog mer zelje de laeftieëd van veer jaor.
NUTTIG VÄÖR T MILIEU
Egels zeen nuttige bieëste. Ze aete väöl sjadelikke insekte en sjlekke. Ouch zeen t groeate oprumers van doeaj bieëste, weggegoeadj aete en fruit. Mer t leefste aete ze raengelwörm.
t is dus ouch in ós eige belang óm de egel te helpe.
Het aantal egels geit hieël hel achteroet. Daoróm sjteit de egel op de lieëst van besjermdje bieëste in de Natuurbesjermingswet.
Het is dus verboeaje eine egel doead te make of met nao hoes te numme.
Mer met nao hoes numme hooft ouch neet want via deze site kintj ederein genete van de egel.
WOEAROM EINE EGEL ES MASCOTTE?
Wiedet hie boeave besjreve is, is eine egel natuurlijk ein sjattig en nuttig bieëstje. Oppe Bieëgdjerhei höbtj gae vast waal ins ein egeltje zeen loupe, want dao kómme ze väöl väör. Mer ouch zitte ze soms bie miense inne hoeaf te ritsele en te knorre.
Es de egel zich hieët opgeroldj den is dr eine sjtaekeligge bol, woea bienao nieks met kint gebäöre.
Wae van Beegden.com dachte noe: Es dae egel zoea door Bieëgdje roltj den kintj dae met zien sjtaekels alles waat op Bieëgdje betrekking hieët metnumme.en lekker op deze internetsite zitte.
Daoróm höbbe wae eine egel es mascotte.
BEEGDEN, EEN BEZOEK MEER DAN WAARD
